കണ്ണൂര്‍ പാപ്പിനിശേരിയിലെ റെയില്‍വെ മേല്‍പാലത്തിന്റെ നിര്‍മാണത്തില്‍ ഗുരുതര ക്രമക്കേടുകള്‍ ഉണ്ടായിട്ടുണ്ടെന്ന് വിജിലന്‍സിന്റെ പ്രാഥമിക പരിശോധനയില്‍ കണ്ടെത്തി. പാലത്തിന്റെ എക്സ്പാന്‍ഷന്‍ ജോയിന്റുകളിലടക്കം തകരാറുണ്ടെന്നാണ് കണ്ടെത്തല്‍. വിശദമായ അന്വേഷണം വേണമെന്നാവശ്യപ്പെട്ട് വിജിലന്‍സ് ഡയറക്ടര്‍ക്ക് ഉടന്‍ റിപ്പോര്‍ട്ട് സമര്‍പ്പിക്കും.
എക്സ്പാന്‍ഷന്‍ ജോയിന്റുകളിലെ വിള്ളലാണ് പ്രധാന പ്രശ്നം. പാലത്തിന്റെ ബെയറിംഗ് മൂവ്മെന്റിലും തകരാറുണ്ട്. വാഹനങ്ങള്‍ കടന്നു പോകുമ്പോഴുള്ള പ്രകമ്പനം കൂടുതലാണെന്നും വിജിലന്‍സ് കണ്ടൈത്തി. നിര്‍മാണത്തിലെ അപാകതകള്‍ കണ്ടെത്താന്‍ വിശദമായ അന്വേഷണം വേണം. ഇക്കാര്യമാവശ്യപ്പെട്ട് കണ്ണൂര്‍ വിജിലന്‍സ് യൂണിറ്റ്വിജിലന്‍സ് ഡയറക്ടര്‍ക്ക് ഉടന്‍ റിപ്പോര്‍ട്ട് നല്‍കും.
പാലത്തില്‍ വിദഗ്ധ പരിശോധനയും നടത്തും. നിര്‍മാണവുമായി ബന്ധപ്പെട്ട മുഴുവന്‍ രേഖകളും ഹാജരാക്കാന്‍ കെ.എസ്.ടി.പിയോട് വിജിലന്‍സ് ആവശ്യപ്പെട്ടിട്ടുണ്ട്. സാംപിള്‍ പരിശോധനാ ഫലം വന്ന ശേഷമായിരിക്കും തുടര്‍ നടപടികള്‍. പാലാരിവട്ടം പാലം നിര്‍മിച്ച ആര്‍.ഡി.എസ് ഗ്രൂപ്പാണ് അതേ കാലഘട്ടത്തില്‍ പാപ്പിനിശ്ശേരി റെയില്‍വേ മേല്‍പ്പാലവും നിര്‍മിച്ചത്. 2014ല്‍ തുടങ്ങിയ നിര്‍മാണം പൂര്‍ത്തിയായത് 2017 ലാണ്. ഉദ്ഘാടനം കഴിഞ്ഞ് ഒരു വര്‍ഷത്തിനുള്ളില്‍ പാലത്തിന് വിള്ളലുണ്ടായതോടെയാണ് വിജിലന്‍സ് അന്വേഷണം തുടങ്ങിയത്.