ലൂസി കളപ്പുരയെ ഫ്രാന്‍സിസ്‌കന്‍ ക്ലാരിസ്റ്റ് സന്യാസ സമൂഹത്തില്‍ നിന്ന് പുറത്താക്കിയ നടപടി വത്തിക്കാന്‍ അപ്പസ്‌തോലിക സമിതി ശരിവച്ചു. ലൂസി കളപ്പുര നല്‍കിയ അപ്പീല്‍ തള്ളിക്കൊണ്ടാണ് നടപടി. വത്തിക്കാനില്‍ നിന്നുള്ള ഉത്തരവ് വന്നതായി എഫ്.സി.സി വ്യക്തമാക്കി. മാനന്തവാടി കാരയ്ക്കാമല കോണ്‍വെന്റിലെ അംഗമായിരിക്കെ സഭാ നിയമങ്ങളും സന്യാസ സമൂഹത്തിന്റെ ചട്ടങ്ങളും ലംഘിച്ചു വെന്നതിനാണ് ലൂസി കളപ്പുരയെ എഫ് സി സി പുറത്താക്കിയത്. സഭാ വിരുദ്ധ നടപടികള്‍ സ്വീരിച്ചിട്ടില്ലെന്ന നിലപാടില്‍ ലൂസി കളപ്പുര ഉറച്ചു നില്‍കുകയാണ്.
2019 മെയ് 11നാണ് സഭാ വിരുദ്ധ പ്രസ്താവനകള്‍ നടത്തിയെന്നാരോപിച്ചും പീഡനക്കേസില്‍ പ്രതിയായ ബിഷപ് ഫ്രാങ്കോ മുളയ്ക്കലിനെതിരെ സമരത്തില്‍ പങ്കെടുത്തതിനും ലൂസി കളപ്പുരയെ എഫ്സിസി സന്യാസ സമൂഹത്തില്‍ നിന്ന് പുറത്താക്കിയത്. തുടര്‍ന്ന് പുറത്താക്കിയ നടപടി പിന്‍വലിക്കണമെന്നും തന്റെ ഭാഗം കേള്‍ക്കണമെന്നും ആവശ്യപ്പെട്ടാണ് വത്തിക്കാന്‍ സഭാ കോടതിയെ സിസ്റ്റര്‍ ലൂസി സമീപിച്ചത്. ഈ അപ്പീലാണ് സഭാ കോടതി തള്ളിയത്.
എന്നാല്‍ താന്‍ സമര്‍പ്പിച്ച അപ്പീലില്‍ ഇതുവരെ വിചാരണ നടന്നിട്ടില്ലെന്നും വിധി വ്യാജ സൃഷ്ടിയാണെന്നുമാണ് സിസ്റ്റര്‍ ലൂസി കളപ്പുരയുടെ പ്രതികരണം. തങ്ങള്‍ അറിയാതെയാണ് വിചാരണ നടന്നതെങ്കില്‍ വിധി സത്യത്തിന് നിരക്കാത്തതാണെന്നും ലൂസി കളപ്പുര മാധ്യമങ്ങളോട് പറഞ്ഞു.