മുന്‍ കോണ്‍സുല്‍ ജനറലിന്റെ ബാഗുകളില്‍ പരിശോധന. ജമാല്‍ അല്‍ സാബിയുടെ ബാഗുകളാണ് കസ്റ്റംസ് പരിശോധിച്ചത്. കോണ്‍സുലേറ്റ് ഉദ്യോഗസ്ഥരുടെ സാന്നിധ്യത്തില്‍ നടത്തിയ പരിശോധനയില്‍ പതിനൊന്ന് ഫോണുകളും രണ്ട് പെന്‍ഡ്രൈവും കണ്ടെത്തിയതായാണ് വിവരം.
തിരുവനന്തപുരം എയര്‍ കാര്‍ഗോ കോംപ്ലക്സില്‍ എത്തിച്ച ബാഗുകളാണ് പരിശോധിച്ചത്. കേന്ദ്രസര്‍ക്കാര്‍ അനുമതിയോടെയായിരുന്നു കസ്റ്റംസിന്റെ പരിശോധന. ജമാല്‍ അല്‍ സാബിയും സ്വര്‍ണം കടത്തിയെന്നാണ് കസ്റ്റംസിന്റെ കണ്ടെത്തല്‍. ഇതിന്റെ അടിസ്ഥാനത്തിലാണ് പരിശോധന നടത്തിയത്.
നയതന്ത്ര ബാഗേജ് വഴി സ്വര്‍ണക്കടത്ത് പിടികൂടുന്നതിന് മുന്‍പ് യുഎഇയിലേക്ക് മടങ്ങിയ ജമാല്‍ അല്‍ സാബി പിന്നീട് കോണ്‍സുലേറ്റില്‍ തിരികെയെത്തിയിരുന്നില്ല. 2020 ഏപ്രിലിലാണ് അല്‍ സാബി യുഎയിലേക്ക് പോയത്.