പെരുമ്പാവൂര്‍: അപകടാവസ്ഥയിലായ റയോണ്‍പുരം പാലം പുനര്‍ നിര്‍മ്മിക്കുന്നതിന് മുന്നോടിയായി കുടിവെള്ള പൈപ്പുകള്‍ മാറ്റി സ്ഥാപിക്കുന്ന പ്രവൃത്തി ആരംഭിച്ചതായി എല്‍ദോസ് കുന്നപ്പിള്ളി എം.എല്‍.എ അറിയിച്ചു. ജല വകുപ്പിന്റെ കീഴിലുള്ള പൈപ്പുകള്‍ മാറ്റി സ്ഥാപിച്ചാല്‍ മാത്രമാണ് നിലവിലുള്ള പാലം പൊളിച്ചു പുനര്‍ നിര്‍മ്മിക്കുന്നതിന് സാധിക്കുകയുള്ളൂ. രണ്ടാഴ്ച്ച കൊണ്ട് ജോലികള്‍ പൂര്‍ത്തീകരിക്കും. അഞ്ച് ജലവിതരണ പൈപ്പുകളാണ് മാറ്റി സ്ഥാപിക്കേണ്ടത്.
40 ലക്ഷം രൂപയാണ് പൈപ്പുകള്‍ മാറ്റി സ്ഥാപിക്കുന്ന പ്രവൃത്തിക്ക് ജല വകുപ്പ് എസ്റ്റിമേറ്റ് തയ്യാറാക്കിയത്. പൊതുമരാമത്ത് വകുപ്പ് പാലങ്ങള്‍ വിഭാഗം വഴി ഇതിനുള്ള അനുമതി ലഭ്യമാക്കിയതിന് ശേഷമാണ് പ്രവൃത്തി ആരംഭിച്ചത്. പതിനെട്ട് മീറ്റര്‍ നീളത്തിലും ഒന്‍പത് മീറ്റര്‍ വീതിയിലുമാണ് പാലം പുനര്‍ നിര്‍മ്മിക്കുന്നത്. രണ്ട് വരി ഗതാഗതത്തിന് അനുയോജ്യമായ രീതിയില്‍ ഒരു വശത്ത് നടപ്പാതയോടെയാണ് പാലം നിര്‍മ്മിക്കുന്നത്. കലുങ്കിന്റെ ഭിത്തി തകര്‍ന്ന് അപകടാവസ്ഥയിലായ റയോണ്‍പുരം പാലം പുനര്‍ നിര്‍മ്മിക്കുന്നതിന് 2.57 കോടി രൂപയാണ് അനുവദിച്ചിട്ടുള്ളത്. സംസ്ഥാനത്തെ അപകടവസ്ഥയിലുള്ള പാലങ്ങളുടെ പട്ടികയില്‍ ഉള്‍പ്പെട്ട പാലമാണ് ഇത്.
വല്ലം നിവാസികള്‍ ഏറ്റവും കൂടുതല്‍ ഉപയോഗിക്കുന്ന പാലം എന്നതിനപ്പുറം നഗരത്തില്‍ ഗതാഗത കുരുക്ക് രൂക്ഷമാകുമ്പോള്‍ ഈ പാലം ഉപയോഗപ്പെടുത്തി വല്ലം, ചൂണ്ടി ഭാഗങ്ങളിലൂടെ സഞ്ചരിക്കുവാന്‍ സാധിക്കുമായിരുന്നു. അന്‍പത് വര്‍ഷത്തിന് മേല്‍ പഴക്കമുള്ള ഒരു പ്രധാന പാലമാണ് റയോണ്‍പുരം പാലം.