കേന്ദ്ര- സംസ്ഥാന സര്‍ക്കാരുകളുടെയും തിരുവനന്തപുരം നഗരസഭയുടെയും ധനസഹായത്തോടെ, അമൃത് പദ്ധതിക്കു കീഴില്‍, വാട്ടര്‍ അതോറിറ്റി അരുവിക്കരയില്‍ നിര്‍മാണം പൂര്‍ത്തീകരിച്ച 75 ദശലക്ഷം ലിറ്റര്‍ പ്രതിദിന ശേഷിയുള്ള ജലശുദ്ധീകരണ ശാലയുടെ പ്രവര്‍ത്തനോദ്ഘാടനം പ്രധാനമന്ത്രി നരേന്ദ്ര മോദി വിഡിയോ കോണ്‍ഫറന്‍സിങ് വഴി നിര്‍വഹിക്കും. വെള്ളിയാഴ്ച തിരുവനന്തപുരം നഗരസഭാ അങ്കണത്തില്‍ നടക്കുന്ന ഉദ്ഘാടനച്ചടങ്ങില്‍ മുഖ്യമന്ത്രി പിണറായി വിജയന്‍ അധ്യക്ഷത വഹിക്കും.
പുതിയ ജലശുദ്ധീകരണ ശാല പ്രവര്‍ത്തനം തുടങ്ങുമ്പോള്‍ തിരുവനന്തപുരം ജലവിതരണ പദ്ധതിയുടെ നിലവിലുള്ള വിതരണം വര്‍ധിക്കുന്നതിനു പുറമേ ഉല്‍പ്പാദിക്കുന്ന 75 എംഎല്‍ഡി ശുദ്ധജലം തിരുമല സോണ്‍, പേരൂര്‍ക്കട സോണ്‍, വട്ടിയൂര്‍ക്കാവ് സോണ്‍, സതേണ്‍ ഹൈ ലെവല്‍ സോണ്‍ എന്നീ മേഖലകളിലേക്കു പമ്പ് ചെയ്യപ്പെടും. ഈ സോണുകള്‍ക്ക് അധിക ജലം ലഭിക്കുന്നതോടെ, സോണുകള്‍ക്കിടയിലുള്ള ഇന്റര്‍ കണക്ഷന്‍ വാല്‍വുകള്‍ അടയ്ക്കാന്‍ സാധിക്കും. അതോടെ തിരുവനന്തപുരം ജലവിതരണ പദ്ധതിയുടെ എട്ടു സോണുകള്‍ക്കും പ്രയോജനം ലഭിക്കും. നഗരത്തിലെ പുതിയ വികസന പദ്ധതികളായ വിഴിഞ്ഞം തുറമുഖം, ഐടി പാര്‍ക്കുകള്‍, നഗരത്തിന്റെ പ്രാന്തപ്രദേശങ്ങളിലേക്ക് ജല വിതരണം വികസിപ്പിക്കല്‍ എന്നിവയും കണക്കിലെടുത്ത് കൊണ്ടാണ് അമൃത് പദ്ധതിക്കു കീഴില്‍ 75 എംഎല്‍ഡി എജലശുദ്ധീകരണശാല നിര്‍ദേശിക്കുകയും അംഗീകരിക്കപ്പെടുകയും ചെയ്തത്.
രണ്ട് അസംസ്‌കൃത ജല പമ്പുകള്‍, 1000 എംഎം വ്യാസമുള്ള 370 മീറ്റര്‍ എംഎസ് പൈപ്പിന്റെ അസംസ്‌കൃത ജല പമ്പിങ് മെയ്ന്‍, 75 എംഎല്‍ഡി ജല ശുദ്ധീകരണശാല, 1000 എംഎം വ്യാസമുള്ള 530 മീഎംഎസ് പൈപ്പിന്റെ ശുദ്ധജല പമ്പിങ് മെയിന്‍, നാലു പമ്പ് സെറ്റുകളുള്ള ശുദ്ധജല പമ്പ് ഹൗസ്, 35 ലക്ഷം ലിറ്ററിന്റെ ശുദ്ധജല സംഭരണി, സബ് സ്റ്റേഷന്‍, സബ് സ്റ്റേഷന്‍ ട്രാന്‍സ്‌ഫോമറുകള്‍, സോളാര്‍ പാനല്‍, പൂര്‍ണ ഓട്ടോമറ്റിക് സ്‌കാഡ സംവിധാനം എന്നിവയാണ് ശുദ്ധീകരണശാലയുടെ പ്രധാന ഘടകങ്ങള്‍. 56.89 കോടി രൂപയ്ക്ക് കരാര്‍ നല്‍കിയ പ്ലാന്റിന്റെ നിര്‍മാണം 15 മാസം കൊണ്ടു പൂര്‍ത്തിയായി.
കേന്ദ്ര ഭവന-നഗരകാര്യ വകുപ്പ് മന്ത്രി ഹര്‍ദീപ് സിങ് പുരി, കേന്ദ്ര ഊര്‍ജ വകുപ്പ് സഹമന്ത്രി രാജ് കുമാര്‍ സിങ്, സംസ്ഥാന തദ്ദേശസ്വയം ഭരണ വകുപ്പു മന്ത്രി എ.സി. മൊയ്തീന്‍, ജലവിഭവ വകുപ്പ് മന്ത്രി കെ. കൃഷ്ണന്‍ കുട്ടി, പൊതുമരാമത്ത് വകുപ്പ് മന്ത്രി ജി. സുധാകരന്‍, സഹകരണ- ദേവസ്വം വകുപ്പ് മന്ത്രി കടകംപള്ളി സുരേന്ദ്രന്‍, മേയര്‍, എംപിമാര്‍, എംഎല്‍എമാര്‍ തുടങ്ങിയവര്‍ ഓണ്‍ലൈന്‍ വഴിയും നേരിട്ടുമായി ചടങ്ങില്‍ പങ്കെടുക്കും.