രാജ്യത്ത് കോവിഡ് പ്രതിസന്ധിക്കിടെ ജനജീവിതം കൂടുതല്‍ ദുരിതത്തിലാക്കി ഇന്ധന വില വീണ്ടും കൂട്ടി. പെട്രോളിന് 25 പൈസയും ഡീസലിന് 26 പൈസയുമാണ് വര്‍ധിപ്പിച്ചത്. ഇതോടെ പെട്രോള്‍, ഡീസല്‍ വിലയില്‍ റെക്കോഡ് വര്‍ധനയാണുണ്ടായിരിക്കുന്നത്.
ഈ മാസം അഞ്ചാം തവണയാണ് വില കൂട്ടുന്നത്. കൊച്ചിയില്‍ വെള്ളിയാഴ്ച ഒരുലിറ്റര്‍ പെട്രോളിന് 85.61 രൂപയും ഡീസലിന് 79.77 രൂപയുമായി. തിരുവനന്തപുരത്ത് 87.48, 81.52, കോഴിക്കോട് 85.91, 79.77 രൂപ എന്നിങ്ങനെയാണ് വില. ലക്ഷക്കണക്കിന് പേര്‍ക്ക് തൊഴില്‍ നഷ്ടപ്പെടുകയും നിരവധി പേരുടെ ശമ്പളം വെട്ടിക്കുറയ്ക്കുകയും ചെയ്ത് കടുത്ത സാമ്പത്തിക പ്രതിസന്ധി നിലനില്‍ക്കെ കഴിഞ്ഞ രണ്ടുമാസത്തിനുള്ളില്‍ ഒരുലിറ്റിര്‍ പെട്രോളിന് 4.69 രൂപയും ഡീസലിന് 5.35 രൂപയുമാണ് കൂട്ടിയത്. ലോക്ഡൗണ്‍ പ്രഖ്യാപിച്ച 2020 മാര്‍ച്ച് 25നുശേഷം ഇതുവരെ പെട്രോളിന് 14.28 രൂപ വര്‍ധിപ്പിച്ചു.
ആറുമാസത്തിനുള്ളില്‍ ഡീസലിന് 14.17 രൂപ കൂട്ടി:
കോവിഡില്‍ ലോകത്ത് എണ്ണ ഉപയോഗം കുറഞ്ഞതോടെ അന്താരാഷ്ട്ര വിപണിയില്‍ ഏപ്രില്‍, മെയ് കാലത്ത് എണ്ണവില വീപ്പയ്ക്ക് 20 ഡോളറായി കുറഞ്ഞു. അതിനനുസരിച്ച് ഇവിടെയും കുറയേണ്ടിയിരുന്നു. എന്നാല്‍ കേന്ദ്ര സര്‍ക്കാര്‍ എക്സൈസ് നികുതി കുത്തനെ കൂട്ടിയതോടെ വിലക്കുറവിന്റെ നേട്ടം ജനങ്ങള്‍ക്ക് ലഭിച്ചില്ല.
8 മാസം; കേന്ദ്രം ഊറ്റിയത് 1.96 ലക്ഷം കോടി:
പെട്രോളിന്റെയും ഡീസലിന്റെയും എക്സൈസ് നികുതി വര്‍ധിപ്പിച്ച് ഏപ്രില്‍ മുതല്‍ നവംബര്‍വരെയുള്ള എട്ടുമാസം കേന്ദ്ര സര്‍ക്കാര്‍ പിരിച്ചത് 1.96 ലക്ഷം കോടി രൂപ. ലോക്ഡൗണില്‍ രാജ്യം നിശ്ചലമായിട്ടും മുന്‍ വര്‍ഷത്തേക്കാള്‍ 48 ശതമാനം അധിക വരുമാനമാണ് ജനങ്ങളില്‍ നിന്ന് ഊറ്റിയെടുത്തത്