കോതമംഗലം: കോതമംഗലത്തിന്റെ സ്വപ്ന പദ്ധതിയായ തങ്കളം- കോഴിപ്പിള്ളി ന്യൂ ബൈപാസ് റോഡിന്റെ നിര്‍മ്മാണോദ്ഘാടനം തങ്കളം ലോറി സ്റ്റാന്റില്‍ വച്ച് നടന്ന ചടങ്ങില്‍ പൊതുമരാമത്ത് വകുപ്പ് മന്ത്രി ജി സുധാകരന് നിര്‍വ്വഹിച്ചു. വീഡിയോ കോണ്‍ഫറന്‍സിങ്ങ് വഴിയാണ് ഉദ്ഘാടനം നിര്‍വ്വഹിച്ചത്. ചടങ്ങില്‍ അധ്യക്ഷത വഹിച്ച ആന്റണി ജോണ്‍ എംഎല്‍എ ശിലാഫലകം അനാഛാദനം ചെയ്തു. ബൈപ്പാസ് നിര്‍മ്മാണവുമായി ബന്ധപ്പെട്ട് ഈ സര്‍ക്കാര്‍ അധികാരത്തില്‍ വന്ന ശേഷം ഭൂമി പൊന്നും വിലയ്ക്ക് ഏറ്റെടുക്കുന്നതിനു വേണ്ട നടപടി സ്വീകരിക്കുകയും 12 പേരില്‍ നിന്നായി 87.5 സെന്റ് സ്ഥലം ഏറ്റെടുക്കുകയും ഭൂമി ഏറ്റെടുത്തവര്‍ക്കായി 2.5 കോടി രൂപ കൈമാറിയിരുന്നു. മിനി സിവില്‍ സ്റ്റേഷന് സമീപമുള്ള സ്വകാര്യ വ്യക്തിയുടെ 31.5 സെന്റ് സ്ഥലം ഏറ്റെടുക്കുന്നതുമായി ബന്ധപ്പെട്ട് വര്‍ഷങ്ങളായി ഹൈക്കോടതിയില്‍ നില നിന്നിരുന്ന സ്റ്റേ ഹൈക്കോടതിയില്‍ നടത്തിയ ഇടപെടലിനെ തുടര്‍ന്ന് കേസ് തീര്‍പ്പാക്കുകയും സ്റ്റേ ഒഴിവാക്കി പ്രസ്തുത സ്ഥലം കൂടി ഏറ്റെടുത്ത് പൊതുമരാമത്ത് വകുപ്പിന് കൈമാറിയാണ് സ്ഥലം ഏറ്റെടുപ്പ് നടപടികള്‍ പൂര്‍ത്തീകരിച്ചത്.
2019- 20 സംസ്ഥാന ബഡ്ജറ്റില്‍ 14.5 കോടി രൂപയാണ് ബൈപാസ് നിര്‍മ്മാണത്തിന് വേണ്ടി അനുവദിച്ചിരുന്നത്.സംസ്ഥാന പാതയായ ആലുവ – മൂന്നാര്‍ റോഡില്‍ തങ്കളം ലോറി സ്റ്റാന്റില്‍ നിന്നും ആരംഭിച്ച് കൊച്ചി- മധുര- ധനുഷ് കോടി ദേശീയപാതയിലെ കോഴിപ്പിള്ളി ജംഗ്ഷനില്‍ അവാസാനിക്കുന്ന ബൈപ്പാസ് റോഡിന്റെ ദൂരം 3 കിലോമീറ്ററാണ്. 15 മീറ്റര്‍ വീതിയില്‍ സ്ഥലം ഏറ്റെടുത്ത് 7.5 മീറ്റര്‍ വീതിയില്‍ GSB, WMM എന്നിവ വിരിച്ച് ആധുനിക ബിഎംബിസി നിലവാരത്തിലാണ് ബൈപാസ് നിര്‍മ്മിക്കുന്നത്.
അതോടൊപ്പം റോഡിന്റെ സംരക്ഷണത്തിനാവശ്യമായ സംരക്ഷണ ഭിത്തികളും,കാനകളും, കലുങ്കുകളും നിര്‍മ്മിക്കും.കൂടാതെ സൈന്‍ ബോര്‍ഡുകള്‍ അടക്കമുള്ള എല്ലാ റോഡ് സുരക്ഷാ സംവിധാനങ്ങളും ഉള്‍പ്പെടുത്തി ആധുനിക നിലവാരത്തിലാണ് നിര്‍മ്മിക്കുന്നത്.കോതമംഗലം നഗരത്തിലെ ഗതാഗതക്കുരുക്കിന് പരിഹാരമാകുന്നതും നഗരത്തിന്റെ വികസനക്കുതിപ്പിന് കരുത്ത് പകരുന്നതുമായ തങ്കളം – കോഴിപ്പിള്ളി ന്യൂ ബൈപാസ് റോഡ് ഏറെ പ്രതിസന്ധികള്‍ മറികടന്ന് യാഥാര്‍ത്ഥ്യമാക്കുവാന്‍ കഴിഞ്ഞതില്‍ ഏറെ സന്തോഷമുണ്ടെന്ന് എംഎല്‍എ പറഞ്ഞു.
ചടങ്ങില്‍ മുന്‍ മന്ത്രി റ്റിയു കുരുവിള, മുനിസിപ്പല്‍ വൈസ് ചെയര്‍ പേഴ്സണ്‍ സിന്ധു ഗണേശന്‍, ബ്ലോക്ക് പഞ്ചായത്ത് പ്രസിഡന്റ് പിഎഎം ബഷീര്‍, പഞ്ചായത്ത് പ്രസിഡന്റുമാരായ പി എം മജീദ്, മിനി ഗോപി,വി സി ചാക്കോ,ഖദീജ മുഹമ്മദ്,പി കെ ചന്ദ്രശേഖരന്‍ നായര്‍, ജെസ്സി സാജു,ജില്ലാ പഞ്ചായത്ത് മെമ്പര്‍മാരായ കെ കെ ദാനി,റഷീദ സലീം,റാണിക്കുട്ടി ജോര്‍ജ്ജ്, മുനിസിപ്പല്‍ പ്രതിപക്ഷ നേതാവ് എ ജി ജോര്‍ജ്ജ്,
കൗണ്‍സിലര്‍മാര്‍, വിവിധ രാഷ്ട്രീയ പാര്‍ട്ടി പ്രതിനിധികളായ ആര്‍ അനില്‍കുമാര്‍(സിപിഐഎം), എം ആര്‍ വിനയന്‍(സിപിഐ), എംഎസ് എല്‍ദോസ് (കോണ്‍ഗ്രസ്(ഐ)), മനോജ് ഇഞ്ചൂര്‍ (ബിജെപി), പിഎം മൈതീന്‍ (മുസ്ലീം ലീഗ്), മനോജ് ഗോപി (ജനതാദള്‍), എന്‍ സി ചെറിയാന്‍ (കേരള കോണ്‍ഗ്രസ്), എ റ്റി പൗലോസ്(കേരള കോണ്‍ഗ്രസ്), എ പി മുഹമ്മദ് (കോണ്‍ഗ്രസ് എസ്), ഷാജി പീച്ചക്കര (കേരള കോണ്‍ഗ്രസ് (സ്‌ക്കറിയ)), ബേബി പൗലോസ് (കേരള കോണ്‍ഗ്രസ് (ബി), ടി പി തമ്പാന്‍ (എന്‍ സി പി), ഇഎം മൈക്കിള്‍ (കേരള കോണ്‍ഗ്രസ് ജേക്കബ്), മുവാറ്റുപുഴ എക്‌സിക്യൂട്ടീവ് എഞ്ചിനീയര്‍ നിരത്ത് വിഭാഗം റെജീന ബീവി, അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ നിരത്ത് ഉപ വിഭാഗം ഷാജീവ് എസ്, അസിസ്റ്റന്റ് എഞ്ചിനീയര്‍ റോഡ്സ് പ്രിന്‍സ് വര്‍ഗീസ് തുടങ്ങിയവര്‍ പങ്കെടുത്തു