കേരളത്തില്‍ വന്ന് പഴയ വസ്ത്രങ്ങളും മറ്റും ശേഖരിച്ചപ്പോള്‍ മൈസൂരു സ്വദേശികള്‍ക്ക് പഴയ വസ്ത്രങ്ങളില്‍ നിന്ന് ലഭിച്ചത് സ്വര്‍ണമാലയും മോതിരവും. ഇവ കേരളത്തിലുള്ള ഉടമയ്ക്ക് തിരികെ എത്തിച്ച് മാതൃകയായിരിക്കുകയാണ് മൈസൂരു സ്വദേശികളായ സുനിലും തുക്കാറാമും. ജീവകാരുണ്യ പ്രവര്‍ത്തനത്തിന്റെ ഭാഗമായി കേരളത്തില്‍ വന്ന് പഴയ വസ്ത്രങ്ങളും മറ്റും ശേഖരിച്ച ഇരുവരും മൈസൂരുവിലെ എസ്.എസ്. മനോജ് സേവാശ്രം ട്രസ്റ്റിന്റെ പ്രവര്‍ത്തകരാണ്.
നാദാപുരത്തിനടുത്തു പുറമേരി വിലാതപുരത്തെ കുന്നോത്ത് താഴെകുനിയിലള്ള രാജന്‍- രജിത ദമ്പതികളുടെ സ്വര്‍ണമാണ് നഷ്ടപ്പെട്ടത്. തിങ്കളാഴ്ച ഉച്ചയ്ക്കാണ് മൈസൂരു സ്വദേശികളായ സുനിലും തുക്കാറാമും താഴെകുനിയില്‍ രാജന്റെ വീട്ടിലെത്തിയത്. ഭാര്യ രജിതയാണ് ഈ സമയത്ത് വീട്ടിലുണ്ടായിരുന്നത്. പഴയ വസ്ത്രം ചോദിച്ചപ്പോള്‍ ഭര്‍ത്താവിന്റെ രണ്ടു ഷര്‍ട്ടും രണ്ടു മുണ്ടും നല്‍കി. ഒരു ഷര്‍ട്ടിന്റെ പോക്കറ്റില്‍ രജിത തന്റെ സ്വര്‍ണമാലയും മോതിരവും അഴിച്ചുവെച്ചിരുന്നു. രണ്ടും കൂടി രണ്ടര പവന്‍ വരും. സുനിലും തുക്കാറാമും ഇതുമായി മടങ്ങുകയും ചെയ്തു. വൈകിട്ടാണ് താന്‍ ആഭരണം അഴിച്ചുവെച്ച ഷര്‍ട്ടാണ് നല്‍കിയതെന്ന് രജിതയ്ക്ക് ഓര്‍മ വന്നത്. വന്നവരെക്കുറിച്ച് ഒരു വിവരവുമില്ല. മൈസൂരു സ്വദേശികള്‍ മാത്രമാണെന്നാണ് ആകെ അറിയാവുന്നത്. ഭര്‍ത്താവും മറ്റും ചേര്‍ന്ന് നാദാപുരം പോലീസില്‍ പരാതിയും നല്‍കി.
എന്നാല്‍ സ്വര്‍ണം നഷ്ടപ്പെട്ടെന്ന് ഉറപ്പിച്ചിരിക്കെയാണ് സുനിലും തുക്കാറാമും ചൊവ്വാഴ്ച രാവിലെ രജിതയുടെ വീട്ടിലേക്ക് കയറിവരുന്നത്. തിരികെ കൊണ്ടുവന്ന മാലയും മോതിരവും അവര്‍ സന്തോഷത്തോടെ രജിതയ്ക്ക് കൈമാറി. ആ നന്മയ്ക്കു മുന്നില്‍ കണ്ണീര്‍ പൊഴിക്കാനല്ലാതെ മറ്റൊന്നും രജിതയ്ക്ക് കഴിഞ്ഞില്ല.
രാത്രി മുറിയിലെത്തി കിട്ടിയ വസ്ത്രങ്ങള്‍ മടക്കിവെക്കുന്നതിനിടെയാണ് ഒരു ഷര്‍ട്ടിന്റെ പോക്കറ്റില്‍ സ്വര്‍ണം കണ്ടത്. അത് രജിത നല്‍കിയ ഷര്‍ട്ടാണെന്ന് അവര്‍ക്ക് ഉറപ്പായിരുന്നു. പഴയ വസ്ത്രമാണ് ചോദിച്ചതെങ്കിലും രജിത നല്‍കിയത് അധികം ഉപയോഗിക്കാത്ത ഷര്‍ട്ടാണ്. ഇക്കാര്യം ഇവര്‍ ശ്രദ്ധിച്ചിരുന്നു. ചൊവ്വാഴ്ച രാവിലെ തന്നെ ബസ് കയറി നേരെ രാജന്റെ വീട്ടിലെത്തി. സേവനമാണ് തങ്ങളുടെ ദൗത്യമെന്നും ഇതിനപ്പുറം ഒന്നും ആഗ്രഹിക്കുന്നില്ലെന്നും സുനിലും തുക്കാറാമും സ്വര്‍ണം രജിതയ്ക്ക് തിരികെ നല്‍കവെ വ്യക്തമാക്കി.
ജീവകാരുണ്യ പ്രവര്‍ത്തനത്തിന്റെ പേരില്‍ വരെ നിരവധി തട്ടിപ്പ് നടക്കുന്ന സമയത്ത് ജീവകാരുണ്യ പ്രവര്‍ത്തകര്‍ക്കും പൊതുസമൂഹത്തിനും മാതൃകയാകുകയാണ് മൈസൂരു സ്വദേശികളായ സുനിലും തുക്കാറാമും.