ഇന്‍ഡോര്‍: സുപ്രിംകോടതി ഇടക്കാല ജാമ്യം അനുവദിച്ചിട്ടും കൊമേഡിയന്‍ മുനവ്വര്‍ ഫാറൂഖിയെ വിട്ടയയ്ക്കാതെ ജയില്‍ അധികൃതര്‍. ഒടുവില്‍ രാത്രി സുപ്രിം കോടതി ജഡ്ജ് ഇന്‍ഡോര്‍ ചീഫ് ജുഡീഷ്യല്‍ മജിസ്ട്രേറ്റിനെ നേരിട്ടു വിളിച്ച് വിട്ടയയ്ക്കാന്‍ ഉത്തരവിടുകയായിരുന്നു. ജാമ്യം അനുവദിച്ച ഔദ്യോഗിക വിവരം ലഭിച്ചില്ലെന്ന കാരണം ചൂണ്ടിക്കാട്ടിയാണ് മുനവ്വറിനെ തടവില്‍ വച്ചത്.
ഇതോടെയാണ് സുപ്രിം കോടതി ജഡ്ജി ഇന്‍ഡോര്‍ സിജെഎമ്മിനെ ഫോണില്‍ വിളിച്ചത്. ഇടക്കാല ജാമ്യം അനുവദിച്ച വിധി വെബ്സൈറ്റില്‍ പരിശോധിക്കണമെന്ന് ആവശ്യപ്പെടുകയും ചെയ്തു. രാത്രി 11 മണിയോടെ ഫാറൂഖി മോചിതനായി.
ജുഡീഷ്യറിയില്‍ സമ്പൂര്‍ണ വിശ്വാസമുണ്ടെന്ന് ജയില്‍ മോചിതനായ ശേഷം ഫാറൂഖി മാധ്യമങ്ങളോട് പ്രതികരിച്ചു. കേസുമായി ബന്ധപ്പെട്ട് പ്രതികരിക്കാന്‍ ആഗ്രഹിക്കുന്നില്ല. നീതി കിട്ടുമെന്ന് ഉറപ്പുണ്ട്- അദ്ദേഹം വ്യക്തമാക്കി.
ഫെബ്രുവരി അഞ്ചിനാണ് ജസ്റ്റിസുമാരായ ആര്‍എഫ് നരിമാന്‍, ബിആര്‍ ഗവായ് എന്നിവര്‍ അംഗങ്ങളായ സുപ്രിംകോടതി ബഞ്ച് ഫാറൂഖിക്ക് ജാമ്യം അനുവദിച്ചത്. നേരത്തെ മൂന്ന് തവണ വിവിധ കോടതികള്‍ ഫാറൂഖിയുടെ ജാമ്യാപേക്ഷ തള്ളിയിരുന്നു.
ബിജെപി എംഎല്‍എ മാലിനി ലക്ഷ്മണ്‍ സിങ് ഗൗറിന്റെ മകന്‍ ഏകലവ്യ സിങ് ഗൗറിന്റെ പരാതിയില്‍ ജനുവരി രണ്ടിനാണ് ഫാറൂഖിയും സഹായി നളിന്‍ യാദവും അറസ്റ്റിലായത്. ആഭ്യന്തര മന്ത്രി അമിത് ഷായെയും ഹിന്ദു ദൈവങ്ങളെയും അപമാനിച്ചു എന്നാണ് പരാതിയില്‍ ആരോപിച്ചിരുന്നത്. കേസില്‍ ജനുവരി ഇവര്‍ അറസ്റ്റിലായത്.