സൗരോര്‍ജ രംഗത്ത് 1000 മെഗാവാട്ട് ഉല്‍പ്പാദനമാണ് ലക്ഷ്യമെന്ന് വൈദ്യുതി വകുപ്പ് മന്ത്രി എം.എം മണി. ഉപഭോക്താക്കള്‍ക്ക് മെച്ചപ്പെട്ട സേവനം നല്‍കുന്നതില്‍ കെ.എസ്.ഇ.ബി പുരോഗതി കൈവരിച്ചെന്നും മന്ത്രി പറഞ്ഞു. വെന്നിയൂരില്‍ 94 ലക്ഷം രൂപ ചെലവില്‍ നിര്‍മിച്ച മിനി വൈദ്യുതി നിലയത്തിന്റെ ഉദ്ഘാടനം ഓണ്‍ലൈനായി നിര്‍വഹിക്കുകയായിരുന്നു അദ്ദേഹം. ഊര്‍ജരംഗത്ത് 50 വര്‍ഷത്തേക്ക് പതിസന്ധിയുണ്ടാകാത്ത വിധത്തില്‍ മുന്നൊരുക്കങ്ങള്‍ നടത്തി. വൈദ്യുത മേഖലയില്‍ രാജ്യത്തെ മറ്റൊരു സംസ്ഥാനങ്ങളിലും ഇല്ലാത്ത വിധം കേരളം മുന്നേറിയെന്നും മന്ത്രി എം.എം മണി വ്യക്തമാക്കി.
എല്ലാ പരാതികളും ഇല്ലാതാക്കി കെ.എസ.്ഇ.ബി വിസ്മയം സൃഷ്ടിച്ചെന്ന് ചടങ്ങില്‍ അധ്യക്ഷനായ സ്പീക്കര്‍ പി. ശ്രീരാമകൃഷ്ണന്‍ പറഞ്ഞു. പവര്‍ കട്ട്, ലോഡ് ഷെഡിംഗ്, വൈദ്യുതി ക്ഷാമം എന്നിവ ജനങ്ങള്‍ മറന്നുപോയ കാലമാണിതെന്നും സ്പീക്കര്‍ അഭിപ്രായപ്പെട്ടു. വെന്നിയൂരില്‍ നടന്ന ചടങ്ങില്‍ അധ്യക്ഷനായ പി.കെ അബ്ദുറബ് എം.എല്‍.എ ശിലാഫലകം അനാച്ഛാദനം ചെയ്തു.
തിരൂരങ്ങാടി ഡിവിഷന്‍, തിരൂരങ്ങാടി സബ് ഡിവിഷന്‍, വെന്നിയൂര്‍ സെക്ഷന്‍ എന്നീ ഓഫീസുകള്‍ക്കായാണ് പുതിയ കെട്ടിടം ഒരുങ്ങിയത്. 470 സ്‌ക്വയര്‍ മീറ്ററില്‍ രണ്ടു നിലകളിലായാണ് വെന്നിയൂരിലെ പുതിയ കെട്ടിടം. ഇലക്ട്രിക്ക് വാഹനങ്ങള്‍ക്കുള്ള ചാര്‍ജിങ് സ്റ്റേഷന്‍, സബ് സ്റ്റേഷന്‍, പോള്‍ കാസ്റ്റിങ് നിര്‍മാണ യൂണിറ്റ് തുടങ്ങിയ പദ്ധതികളും ഭാവിയില്‍ ഇവിടെ നടപ്പാക്കുന്നത് സര്‍ക്കാറിന്റെ പരിഗണനയിലുണ്ട്.