പെരുമ്പാവൂര്‍: രായമംഗലം ഗ്രാമപഞ്ചായത്തിലെ കടിഞ്ഞൂല്‍ ചിറ ഭാഗത്ത് നിര്‍മ്മിച്ച പാലത്തിന്റെ ഉദ്ഘാടനം എല്‍ദോസ് കുന്നപ്പിള്ളി എം.എല്‍.എ നിര്‍വഹിച്ചു. പെരിയാര്‍ വാലി ലൊ ലെവല്‍ കനാലിന്റെ കുറുകെ നിര്‍മ്മിച്ച പാലത്തിന് കഴിഞ്ഞ വര്‍ഷത്തെ എം.എല്‍.എ ആസ്തി വികസന ഫണ്ടില്‍ നിന്നും 23.70 ലക്ഷം രൂപയാണ് അനുവദിച്ചത്.
കീഴില്ലം കുറിച്ചിലക്കോട് റോഡില്‍ നിന്ന് തായ്ക്കരചിറ ഭാഗത്തേക്ക് വരുന്നതിന് ഏകദേശം ഇരുനൂറ്റിയന്‍പതോളം കുടുംബങ്ങള്‍ക്ക് പാലം പ്രയോജനം ചെയ്യും. മഴവെള്ളം പോകുന്നതിന് കനാലിന് കുറുകെ പെരിയാര്‍ വാലി നിര്‍മ്മിച്ച ചാനലിന് മുകളില്‍ ഇട്ട സ്ലാബിലൂടെയാണ് ജനങ്ങള്‍ വര്‍ഷങ്ങളായി പാലം കടക്കുന്നത്. പുതിയ പാലം നിര്‍മ്മിക്കണമെന്ന പ്രദേശ വാസികളുടെ ആവശ്യത്തിന് ഇതോടെ പരിഹാരമാവുകയാണെന്ന് എംഎല്‍എ പറഞ്ഞു. 11 മീറ്റര്‍ നീളത്തില്‍ 4.5 മീറ്റര്‍ വീതിയിലുമാണ് പാലം നിര്‍മ്മിക്കുന്നത്.
രായമംഗലം ഗ്രാമ പഞ്ചായത്ത് പ്രസിഡന്റ് എന്‍.പി അജയകുമാര്‍ ചടങ്ങില്‍ അദ്ധ്യക്ഷത വഹിച്ചു. കൂവപ്പടി ബ്ലോക്ക് പഞ്ചായത്ത് പ്രസിഡന്റ് ബേസില്‍ പോള്‍, ജില്ലാ പഞ്ചായത്ത് അംഗം ഷൈമി വറുഗീസ്, ബ്ലോക്ക് പഞ്ചായത്തംഗങ്ങളായ ബീന ഗോപിനാഥ്, അംബികാ മുരളീധരന്‍, ഗ്രാമ പഞ്ചായത്തംഗങ്ങളായ ജോയി പൂണേലി, മാത്യൂസ് തരകന്‍, മിനി ജോയി, കെ.വി ജെയ്സണ്‍, രാജന്‍ വര്‍ഗീസ്, ലൈജു തോമസ്, ഐസക് തുരുത്തിയില്‍, കെ.വി ഷാ, ജിജോ മറ്റത്തില്‍, കെ.വി എല്‍ദോ എന്നിവര്‍ സംസാരിച്ചു.