കൊച്ചി: രാജ്യാന്തര ചലച്ചിത്ര മേളയുടെ രണ്ടാം ദിനത്തില്‍ പ്രേക്ഷകര്‍ ആകാംഷപൂര്‍വ്വം കാത്തിരുന്ന ചുരുളി ഉള്‍പ്പടെ 24 ചിത്രങ്ങള്‍ പ്രദര്‍ശനത്തിന്. മോഹിത് പ്രിദര്‍ശി സംവിധാനം ചെയ്ത ഹിന്ദി ചിത്രം കൊസയും മത്സരവിഭാഗത്തില്‍ പ്രദര്‍ശിപ്പിക്കും. അസര്‍ബൈജാനിയന്‍ ചിത്രം ബൈലെസുവാര്‍, വിയറ്റ്‌നാമീസ് ചിത്രം റോം, ബ്രസീലിയന്‍ ചിത്രം മെമ്മറി ഹൗസ്, മെക്‌സിക്കന്‍ ചിത്രം ബേര്‍ഡ് വാച്ചിങ് തുടങ്ങിയവയാണ് ഇന്നത്തെ മറ്റ് മത്സര ചിത്രങ്ങള്‍.
ലിജോ ജോസ് പെല്ലിശ്ശേരി സംവിധാനം ചെയ്ത ചുരുളി തിരുവന്തപുരത്ത് മികച്ച പ്രേക്ഷക പ്രതികരണം നേടിയിരുന്നു. മേളയുടെ മത്സരവിഭാഗത്തിലാണ് ചിത്രം പ്രദര്‍ശിപ്പിക്കുന്നത്. വിപിന്‍ ആറ്റ്‌ലീ ചിത്രം മ്യൂസിക്കല്‍ ചെയറാണ് ഇന്ന് പ്രദര്‍ശനത്തിനെത്തുന്ന മറ്റൊരു മലയാള ചിത്രം.
ഡോണ്‍ പാലത്തറ സംവിധാനം ചെയ്ത മലയാള ചിത്രം 1956, മധ്യതിരുവിതാംകൂറും ഇല്ലിലാരെ അല്ലിഗ ഹോഗല്ലാരെ എന്ന ഗിരീഷ് കാസറവള്ളി ചിത്രവും കലൈഡോസ്‌കോപ്പില്‍ വിഭാഗത്തില്‍ ഇന്ന് പ്രദര്‍ശനത്തിനെത്തുന്നുണ്ട്.
ലോകസിനിമാ വിഭാഗത്തില്‍ പ്രേക്ഷക പ്രീതി നേടിയ നെവര്‍ ഗൊണാ സ്‌നോ എഗൈന്‍, നോവെയെര്‍ സ്‌പെഷ്യല്‍ എന്നീ ചിത്രങ്ങളും ഇന്ന് പ്രദര്‍ശിപ്പിക്കും. മാജിക്കല്‍ റിയലിസത്തിലൂടെ ഋതുക്കള്‍ ചിത്രീകരിക്കുന്ന കിം കി ഡുക്കിന്റെ സ്പ്രിങ്, സമ്മര്‍, ഫാള്‍, വിന്റര്‍ ആന്‍ഡ് സ്പ്രിഗ് എന്ന ചിത്രം ഹോമേജ് വിഭാഗത്തില്‍ പ്രദര്‍ശിപ്പിക്കുന്നുണ്ട്.