രാജ്യാന്തര തലത്തില്‍ അംഗീകാരം നേടിയ ‘ഹാസ്യം’, ‘ബിരിയാണി’ ഉള്‍പ്പടെ അഞ്ചു മലയാള ചിത്രങ്ങള്‍ വെള്ളിയാഴ്ച പ്രദര്‍ശനത്തിനെത്തുന്നു. അറ്റെന്‍ഷന്‍ പ്‌ളീസ്, വാങ്ക്, സീ യു സൂണ്‍ എന്നിവയാണ് പ്രദര്‍ശനത്തിനെത്തുന്ന മറ്റ് ചിത്രങ്ങള്‍. ഹാസ്യം രാജ്യാന്തര മത്സര വിഭാഗത്തിലും ബിരിയാണി കാലിഡോസ്‌കോപ്പ് വിഭാഗത്തിലും മറ്റ് മൂന്നു ചിത്രങ്ങള്‍ മലയാളം സിനിമ ഇന്ന് എന്ന വിഭാഗത്തിലും പ്രദര്‍ശിപ്പിക്കപ്പെടുന്നു. ആകെ 24 ചിത്രങ്ങളാണ് നാളെ വേദിയിലെത്തുന്നത്.
മികച്ച പ്രേക്ഷക പ്രതികരണം നേടിയ രാജ്യാന്തര ചിത്രങ്ങളും നാളെ പ്രദര്‍ശിപ്പിക്കപ്പെടുന്നുണ്ട്. ലോക സിനിമ വിഭാഗത്തില്‍ ‘യെല്ലോ ക്യാറ്റ്’, ‘മാന്‍ ഹു സോള്‍ഡ് ഹിസ് സ്‌കിന്‍’ ‘സമ്മര്‍ ഓഫ് 85’ തുടങ്ങിയവയും രാജ്യാന്തര മത്സര വിഭാഗത്തില്‍ ‘ദേര്‍ ഈസ് നോ ഇവില്‍’ ‘ക്രോണിക്കിള്‍സ് ഓഫ് സ്പേസ്’, ‘ലോണ്‍ലി റോക്ക്’, ‘ഡെസ്റ്ററോ’ തുടങ്ങിയ ചിത്രങ്ങളും പ്രദര്‍ശിപ്പിക്കുന്നു. തമിഴ് സിനിമകളായ ‘കുതിരൈ വാല്‍’, ‘സേത്തുമ്മാന്‍’ എന്നിവയും ബിഗ് സ്‌ക്രീനില്‍ എത്തുന്നു.
ലൈഫ് ടൈം അചീവമെന്റ് അവാര്‍ഡ് നേടിയ ജീന്‍ ലുക് ഗൊദാര്‍ദിന്റെ ‘ബ്രത്‌ലെസ്സ്’, ഛായാഗ്രാഹകന്‍ രാമചന്ദ്രബാബുവിന്റെ സ്മരണാര്‍ത്ഥം ‘അഗ്രഹാരത്തില്‍ കഴുതൈ’ എന്നീ ചിത്രങ്ങളും പ്രദര്‍ശിപ്പിക്കപ്പെടുന്നു.