ഡാമുകളുമായി ബന്ധപ്പെട്ട ജാഗ്രതാ നിര്‍ദേശങ്ങള്‍ ഇനി അത്യാധുനിക സംവിധാനങ്ങളിലൂടെ കണ്ടറിഞ്ഞ ശേഷം മാത്രം. ഇടുക്കി അണക്കെട്ടിന്റെ സ്വാഭാവിക വ്യതിയാനങ്ങള്‍ വരെ അപ്പപ്പോള്‍ അറിയാന്‍ കഴിയുന്ന പുതിയ സംവിധാനമാണ് റിപ്പബ്‌ളിക് ദിനത്തില്‍ പ്രവര്‍ത്തനസജ്ജമാകുന്നത്. ഓരോ വ്യതിയാനങ്ങളും കണ്ടറിഞ്ഞ് നിരീക്ഷണ ഫലങ്ങള്‍ കെഎസ്ഇബിയുടെ പ്രധാന സെന്ററുകളില്‍ എത്തിക്കുന്ന രശ്മി ഫോര്‍ ഡാംസ് (Realtime Early warning, Structural Health Monitoring & Interpretation for Dams – RESHMI FOR DAMS) എന്ന പുതിയ സാങ്കേതിക വിദ്യയാണ് ഉദ്ഘാടനം ചെയ്യുന്നത്.
ഇടുക്കി അണക്കെട്ടിന്റെ ദൈനംദിന പരിപാലനവുമായി ബന്ധപ്പെട്ട് അണക്കെട്ടില്‍ സ്ഥാപിച്ചിരിക്കുന്ന വിവിധ ഉപകരണങ്ങള്‍ തല്‍സമയം നിരീക്ഷണം നടത്തി നിരീക്ഷണ ഫലങ്ങള്‍ കൃത്യമായി ഓരോ മണിക്കൂറിലും കണ്‍ട്രോള്‍ റൂമിലും പള്ളം ചീഫ് എഞ്ചിനീയറുടെ ഓഫീസിലും ലഭ്യമാക്കും. ഇതില്‍പ്പെടുത്തി ഡാമിന്റെ ഗാലറിയ്ക്കുളളില്‍ സ്ഥാപിച്ചിരിക്കുന്ന ജോയിന്റ് മീറ്റര്‍, ക്രാക്ക് മീറ്റര്‍, സ്ട്രെയിന്‍ മീറ്റര്‍, ടില്‍റ്റ് മീറ്റര്‍, പിസോ മീറ്റര്‍ മുതലായവയില്‍ നിന്നുമുള്ള യഥാസമയ റീഡിംഗുകള്‍ കണ്‍ട്രോള്‍ റൂമുകളില്‍ ലഭ്യമാകും.
കൂടാതെ ചെറുതോണി ഡാമിന്റെ മുകളില്‍ സ്ഥാപിച്ചിരിക്കുന്ന റഡാര്‍ വാട്ടര്‍ ലെവല്‍ മുഖേന ഓരോ മണിക്കൂറിലും റിസര്‍വോയറിലെ ജലനിരപ്പ് കണ്‍ട്രോള്‍ റൂമില്‍ ലഭ്യമാകും. ഡാമിന്റെ ഡൗണ്‍സ്ട്രീമില്‍ സ്ഥാപിച്ചിരിക്കുന്ന റോബോട്ടിക് ടോട്ടല്‍ സ്റ്റേഷന്‍ ഡൗണ്‍സ്ട്രീം ഫെയിസില്‍ സ്ഥാപിച്ചിരിക്കുന്ന 26 ടാര്‍ഗെറ്റിന്റെ ഓരോ മണിക്കൂറിലുമുള്ള വ്യതിയാനം കണ്‍ട്രോള്‍ റൂമില്‍ എത്തിക്കും.
ഇടുക്കി മെഡിക്കല്‍ കോളേജിന് സമീപം സ്ഥാപിച്ചിട്ടുള്ള ഓട്ടോമാറ്റിക് വെതര്‍ സ്റ്റേഷന്‍ വഴി ഇടുക്കി ക്യാച്ച്മെന്റിലെ മഴയുടെ അളവ്, കാറ്റിന്റെ ഗതി, താപനില മുതലായവ അപ്പോഴപ്പോള്‍ ലഭിച്ചുകൊണ്ടിരിക്കും. അണക്കെട്ടില്‍ സ്ഥാപിച്ചിട്ടുള്ള ഉപകരണങ്ങള്‍ വഴി അണക്കെട്ടിന്റെ അടി നിരപ്പ് മുതല്‍ ജലസംഭരണിയുടെ പലവിതാനത്തിലെ താപനിലയും അറിയാം. ഇതെല്ലാം ക്രോഡീകരിച്ച് അത്യാധുനിക സോഫ്ട് വെയര്‍ ഉപയോഗിച്ച് അണക്കെട്ടിന്റെ അപ്പോഴപ്പോഴുളള സ്വാഭാവിക വ്യതിയാനങ്ങള്‍ പഠിക്കുന്നതിന് കഴിയും. അസ്വാഭാവിക വ്യതിയാനം ഉണ്ടാകുകയാണെങ്കില്‍ അത് ജാഗ്രതാ മുന്നറിയിപ്പ് നല്‍കുകയും ചെയ്യും.