തൊടുപുഴ: തിരഞ്ഞെടുപ്പ് മുന്നില്‍ക്കണ്ടുള്ള രാഷ്ട്രീയ സ്റ്റണ്ട് മാത്രമാണ് ഈ ബജറ്റ് എന്ന് ഡീന്‍ കുര്യാക്കോസ് എം.പി. കഴിഞ്ഞ നാലര വര്‍ഷക്കാലവും പൊള്ളയായ വാഗ്ദാനങ്ങളും പ്രഖ്യാപനങ്ങളും മാത്രം നടത്തിയ ഗവണ്‍മെന്റ് തെരഞ്ഞെടുപ്പിന് 3 മാസം മാത്രം അവശേഷിക്കുമ്പോള്‍ ഇടുക്കിയിലെ ജനങ്ങളെ കബളിപ്പിക്കുന്നതിനാണ് വീണ്ടും പദ്ധതി പ്രഖ്യാപനങ്ങളുമായി രംഗത്ത് എത്തുന്നത്.
ധനമന്ത്രി തോമസ് ഐസക്കിന്റെ കഴിഞ്ഞ ബഡ്ജറ്റുകളെല്ലാം പ്രഖ്യാപിച്ച ഇടുക്കി പാക്കേജ് എവിടെയെന്നറിയാന്‍ ജനങ്ങള്‍ക്ക് ആഗ്രഹമുണ്ട്. കാര്‍ഷിക മേഖലയുടെ വികസനത്തിനായി കഴിഞ്ഞ നാലര വര്‍ഷവും ഒരു പദ്ധതിയും നടപ്പാക്കാന്‍ കഴിയാത്ത ഈ ഗവണ്‍മെന്റ് ഇനി പാക്കേജിനുള്ള ചര്‍ച്ച നടത്തുന്നു എന്നാണ് ഇപ്പോള്‍ പറയുന്നത്.
ഭൂമിവിനിയോഗത്തിനും നിര്‍മ്മാണ പ്രവര്‍ത്തനങ്ങള്‍ക്കും കടുത്ത നിയന്ത്രണം ഏര്‍പ്പെടുത്തിയ ഈ ഗവണ്‍മെന്റ് ഇടുക്കിയിലെ മലയോര മേഖലയിലെ ജനജീവിതത്തെ സ്തംഭിപ്പിക്കുന്ന നയമാണ് സ്വീകരിച്ചു വരുന്നത്. കാര്‍ഷിക ഉത്പാദന വര്‍ദ്ധനവിനും ഉല്‍പാദന ചെലവിനനുസൃതമായ വില ലഭ്യതയ്ക്കും പദ്ധതികളില്ല. ഇടുക്കിയിലെ തോട്ടം തൊഴിലാളികളുടെയും കര്‍ഷകത്തൊഴിലാളികളെ ജീവിതദുരിതങ്ങള്‍ ലഘൂകരിക്കുന്നതിന് ഒരു പദ്ധതിയും ഇല്ലെന്നത് ദു:ഖകരമെന്നും എംപി പറഞ്ഞു. ഇടുക്കികാരുടെ കണ്ണില്‍ പൊടിയിടുന്ന വെറും കസര്‍ത്ത് മാത്രമാണ് ഈ ബഡ്ജറ്റെന്നും എംപി കൂട്ടിച്ചേര്‍ത്തു.