മാനസികമായി കരുത്തില്ലാത്ത കര്‍ഷകരാണ് ജീവനൊടുക്കുന്നതെന്ന് കര്‍ണാടക കൃഷിമന്ത്രി ബി.സി. പാട്ടീല്‍. മൈസൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. മാനസിക പ്രശ്‌നങ്ങളുള്ള കര്‍ഷകരാണ് ജീവനൊടുക്കിയത്. ജീവനൊടുക്കുന്നവര്‍ ഭീരുക്കളാണെന്നും അതിന് സര്‍ക്കാരിനെ കുറ്റപ്പെടുത്താന്‍ സാധിക്കില്ലെന്നും അദ്ദേഹം പ്രതികരിച്ചു.
കൃഷിക്കാര്‍ മാത്രമല്ല, വ്യവസായികളും ജീവനൊടുക്കുന്നു. ഇത്തരമുള്ള എല്ലാ മരണങ്ങളും കര്‍ഷകരുടെ ആത്മഹത്യയാണെന്ന് വിശേഷിപ്പിക്കാനാവില്ല. ആശ്രിതരുടെ ഭാവിയെക്കുറിച്ച് ചിന്തിക്കാതെ ജീവിതം അവസാനിപ്പിക്കുന്ന കര്‍ഷകര്‍ ഭീരുക്കളാണ്. നിങ്ങള്‍ ആത്മഹത്യ ചെയ്ത കര്‍ഷകന്റെ വീട്ടില്‍ പോയി ആശ്വസിപ്പിച്ചതു കൊണ്ട് ഈ പ്രവണത നിലയ്ക്കില്ല. തങ്ങളുടെ ആത്മവിശ്വാസം വര്‍ധിപ്പിക്കാന്‍ കര്‍ഷകര്‍ തയാറാവണമെന്നും കൃഷിമന്ത്രി പ്രതികരിച്ചു.