പെരുമ്പാവൂര്‍: വെങ്ങോല ഗ്രാമപഞ്ചായത്ത് ടാങ്ക് സിറ്റി പ്രദേശത്ത് നിര്‍മ്മിക്കുന്ന കുടിവെള്ള പദ്ധതിക്ക് തുടക്കമായി. എല്‍ദോസ് കുന്നപ്പിള്ളി എം.എല്‍.എ പദ്ധതിയുടെ നിര്‍മ്മാണോദ്ഘാടനം നിര്‍വഹിച്ചു. കഴിഞ്ഞ വര്‍ഷത്തെ ആസ്തി വികസന ഫണ്ടില്‍ നിന്നും അനുവദിച്ച 17.10 ലക്ഷം രൂപ വിനിയോഗിച്ചാണ് പദ്ധതി നടപ്പിലാക്കുന്നത്.
ആലിന്‍ ചുവട്, വളയന്‍ ചിറങ്ങര എല്‍.പി സ്‌കൂളിന് സമീപമുള്ള പ്രദേശങ്ങളിലെ അറുപതോളം കുടുംബങ്ങള്‍ക്ക് ഇതിന്റെ പ്രയോജനം ലഭിക്കും. നിലവിലുള്ള ആലിന്‍ ചുവട് ചിറയില്‍ നിന്നാണ് പദ്ധതിക്ക് ആവശ്യമായ ജലം ലഭ്യമാക്കുന്നത്. മോട്ടോര്‍ പുരയും 25000 ലിറ്റര്‍ ശേഷിയുള്ള ജല സംഭരണിയും നിര്‍മ്മിക്കും. 15 കുതിര ശക്തിയുള്ള മോട്ടോര്‍ സ്ഥാപിക്കുന്നതിനും തുക ഉള്‍ക്കൊള്ളിച്ചിട്ടുണ്ട്. ജലവിതരണത്തിനായി ഒന്നര കിലോമീറ്റര്‍ ദൈര്‍ഘ്യത്തില്‍ പൈപ്പ് ലൈനുകളും സ്ഥാപിക്കും.
ഈ പ്രദേശങ്ങളില്‍ കാലങ്ങളായി കുടിവെള്ള ക്ഷാമം രൂക്ഷമാണ്. ജല വകുപ്പിന്റെ കുടിവെള്ളം പോലും ഇവിടെ ലഭ്യമാകുന്നില്ല എന്ന പരാതിയുണ്ട്. നിലവിലുള്ള ആലിന്‍ ചുവട് പട്ടിക ജാതി കുടിവെള്ള പദ്ധതിക്ക് സമീപമായാണ് പുതിയ പദ്ധതിയും നിര്‍മ്മിക്കുന്നത്. ഗ്രാമപ്പഞ്ചായത്ത് പ്രസിഡന്റ് എന്‍.ബി ഹമീദ് അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്റ് കെ.എം അന്‍വര്‍ അലി, പഞ്ചായത്ത് വൈസ് പ്രസിഡന്റ് ഷംല നാസര്‍, പഞ്ചായത്ത് അംഗം ഷിഹാബ് പള്ളിക്കല്‍, കെ.എം സുകുമാരന്‍, ജോജി ജേക്കബ്ബ്, ടി.എം കുര്യാക്കോസ്, വി.എച്ച് മുഹമ്മദ്, എം.പി ജോര്‍ജ്ജ്, പി.എ ജോസ്, പി.പി യാക്കോബ് എന്നിവര്‍ സംസാരിച്ചു.