ഇടതുമുന്നണിയില്‍ താക്കോല്‍ സ്ഥാനം ലക്ഷ്യമിട്ട് ജോസ് കെ. മാണി. എല്‍ഡിഎഫിന് ഭരണതുടര്‍ച്ച ഉണ്ടായാല്‍ ധനം, റവന്യൂ, നിയമ വകുപ്പുകള്‍ ചോദിക്കാന്‍ കേരളാ കോണ്‍ഗ്രസ് എമ്മിന്റെ തീരുമാനം. അഞ്ച് ബോര്‍ഡ്, കോര്‍പറേഷന്‍ പദവികള്‍ വേണമെന്നും പാര്‍ട്ടിയില്‍ പൊതു വികാരമുണ്ട്. ജോസ് കെ. മാണിക്കും റോഷി അഗസ്റ്റ്യനും പുറമേ എന്‍. ജയരാജിനും ക്യാബിനറ്റ് പദവി ഉറപ്പാക്കും.
അതേസമയം സീറ്റ് വിഭജന ഘട്ടത്തില്‍ തന്നെ പദവികള്‍ ഉറപ്പാക്കി മുന്നിണിയില്‍ ശക്തരാകാനാണ് ജോസ് കെ. മാണിയുടെ നീക്കം. ഇതിന്റെ ഭാഗമായി രാജ്യസഭാംഗത്വം ജോസ് കെ. മാണി ഇന്ന് രാജിവയ്ക്കും. സിപിഐ അടക്കമുള്ള ഘടകകക്ഷികളുടെ എതിര്‍പ്പ് മറികടന്ന് വേണം ജോസ് കെ. മാണി വിഭാഗത്തിന് പദവികള്‍ നേടിയെടുക്കാന്‍. നിലവില്‍ ജോസ് പക്ഷം ആവശ്യപ്പെടുന്ന സ്ഥാനങ്ങള്‍ സിപിഎമ്മും, സിപിഐയും കൈവശം വെച്ചിട്ടുള്ളതാണ്. അതുകൊണ്ടു തന്നെ പദവികള്‍ സംബന്ധിച്ച് തര്‍ക്കം രൂക്ഷമാകുമെന്ന് ഉറപ്പാണ്. നിലവില്‍ ധനം, നിയമ വകുപ്പുകള്‍ സിപിഐഎമ്മും, റവന്യൂവകുപ്പ് സിപിഐയുമാണ് കൈവശം വച്ചിട്ടുള്ളത്. എതിര്‍പ്പുകള്‍ ഉണ്ടായാല്‍ തദ്ദേശ തെരഞ്ഞെടുപ്പിലെ നേട്ടം ചൂണ്ടിക്കാട്ടി സ്ഥാനങ്ങള്‍ നേടിയെടുക്കാനാണ് ജോസ് കെ. മാണി വിഭാഗത്തിന്റെ നീക്കം.
നിലവില്‍ പാലാ സീറ്റിന്റെ കാര്യത്തില്‍ അതൃപ്തിയുമായി എന്‍സിപി പരസ്യമായി രംഗത്ത് വന്നിട്ടുണ്ട്. ഒപ്പം സിപിഐയുടെ സീറ്റുകള്‍ കൂടി ജോസ് പക്ഷം ആവശ്യപ്പെടുന്നത് ഇടതുപക്ഷത്തിന് പ്രതിസന്ധി സൃഷ്ടിക്കും. സിപിഐ ജോസ് പക്ഷത്തെ മുന്നണിയിലേക്ക് എടുമ്പോള്‍ തന്നെ അതൃപ്തി അറിയിച്ചിരുന്നു. പിന്നീട് ചര്‍ച്ചകളിലൂടെ വിട്ടുവീഴ്ച ചെയ്ത സിപിഐക്ക് ബദല്‍ ശക്തിയാകാനാണ് ജോസ് പക്ഷത്തിന്റെ നീക്കം. മുന്നണിയില്‍ സിപിഐക്ക് വെല്ലുവിളി സൃഷ്ടിച്ചാവും ജോസ് പക്ഷം സ്ഥാനങ്ങള്‍ ആവശ്യപ്പെടുന്നത്.
നിയമസഭ തെരഞ്ഞെടുപ്പിനായുള്ള സീറ്റ് വിഭജന ചര്‍ച്ചകള്‍ക്കൊപ്പം തന്നെ കേരള കോണ്‍ഗ്രസ് എം അധികാര പദങ്ങള്‍ ഉറപ്പാക്കുകയാണ്. കെ.എം. മാണിയുടെ അഭാവത്തിലാണ് കേരളാ കോണ്‍ഗ്രസ് എം ഇടതുമുന്നണിക്കൊപ്പം എത്തിയതെങ്കിലും, യുഡിഎഫ് മന്ത്രിസഭയില്‍ കെ.എം. മാണി കൈകാര്യം ചെയ്ത പ്രധാന വകുപ്പുകള്‍ തന്നെയാണ് ജോസ് കെ. മാണിയ ഇടതു മുന്നണിയോട് ആവശ്യപ്പെടുന്നത്. 2011- 2016 കാലഘട്ടത്തില്‍ ക്യാബിനറ്റ് റാങ്കോടെ ചീഫ് വിപ്പ് പദവിയും കേരള കോണ്‍ഗ്രസ് എമ്മിന് യുഡിഎഫ് നല്‍കിയിരുന്നു. ഇക്കാര്യവും എല്‍ഡിഎഫുമായി ഉള്ള ചര്‍ച്ചകളില്‍ ജോസ് കെ. മാണി ഉയര്‍ത്തിക്കാട്ടും.